ഞാന്‍ കവിയല്ലാത്തത് എത്ര നന്നായി

ഉറക്കം

തലയിലുഴിഞ്ഞു 

കൊണ്ടേയിരിക്കുന്ന

വൈകുന്നേരം,

കവിത കൊറിച്ച്

രണ്ടു പെണ്‍കുട്ടികള്‍

ചിക്കന്‍ പോക്സിന്‍റെ 

കുരുക്കുഴികള്‍

ചിത്രം വരച്ച മൂക്ക്

പാതി കുടിച്ച

പ്രണയക്കയ്പ്പ്  ചുണ്ടില്‍

വെയില്‍  വറ്റിയ വഴിയില്‍

കരഞ്ഞ് തളര്‍ന്ന്

സൂചിമുനക്കണ്ണുകള്‍

കറുത്ത ഉടലേ..

കറുത്ത സന്ധ്യേ ..

കറു കറുത്ത കവിതേ..

ഇര പിടയുന്നത്

മറ്റൊരിര പിടിക്കാനോ..?

***********

പെണ്‍കുട്ടികള്‍

കവിത കൊറിച്ചു കഴിഞ്ഞ്

ഇലഞ്ഞി മരച്ചോട്ടില്‍

നില്‍ക്കുന്നു

പതുക്കെ

വളരെ പതുക്കെ

ഒരു തീവണ്ടി പുക തുപ്പുന്നു

വേഗങ്ങളുടെ

ആവര്‍ത്തനത്തില്‍

പാളങ്ങള്‍ ഭോഗിക്കപ്പെടുന്നു

ചൂടും വേഗതാളവും

ഒരുറക്കം പോലെ ഞെട്ടുന്നു

ഇലഞ്ഞി മരം

ഇലയെറിഞ്ഞുണര്‍ത്താന്‍

പരാജയപ്പെടുന്നു

ഇലകള്‍

മണ്ണ് പൊത്തിക്കരഞ്ഞ് 

കാറ്റിലേക്കോടിപ്പോകുന്നു

**************

കവിത കൊറിച്ചു കഴിഞ്ഞ

പെണ്‍കുട്ടികളെത്തേടി

കവി എത്തുന്നു

നെഞ്ചിലമര്‍ത്തി

തലേന്ന് കുടിച്ചതത്രയും

ഓക്കാനിച്ചു കളയുന്നു.

ഒരോവ് ചാലും

കവിത വായിക്കാതിരുന്നത്

എത്ര നന്നായി .?!