അച്ഛനും അമ്മയും പാര്‍ട്ടിയും

പാര്‍ട്ടി,
കൊടി പുതപ്പിച്ചിരുന്നു.
വാഹനങ്ങളുടെ
വരി തീര്‍ത്തിരുന്നു.

നേതാക്കള്‍,
ക്യാമറ കാണുന്ന
സമയങ്ങളിലൊക്കെയും
കണ്ണ് തുടച്ചിരുന്നു

ചോര പുരണ്ട
കുപ്പായക്കഷണവുമായി
പോലീസുമെത്തിയിരുന്നു.

മൂന്നു നാള്‍ പനിച്ചു കിടന്ന്
നാലാം നാള്‍ ഇറങ്ങിയോടിയ
അമ്മയെ കാണാന്‍ മാത്രം
ആരും വന്നില്ല.

അച്ഛനു കൊടി പുതപ്പിച്ചവരാരോ
അമ്മയെ കൊടിയുടുപ്പിച്ചെന്ന്
കേള്‍ക്കും മുമ്പെ
ഞാന്‍ പോവുകയാണ്